قبل ما يولي نجم المغاربة الأول, نور الدين أمرابط غسل الطباسل باش ياكل

أسد حقيقي داخل وبرا الملعب!


حتا حاجة ماكتجي ساهلة. و طريق النجاح فيه بزاف ديال العثرات و الحفاري, و بزاف ديال الأطباق خاس يتغسلو ف حالة نور الدين أمرابط.

نور الدين أمرابط, اللي كلنا عرفناه من خلال المنتخب الوطني المغربي ف الاسابيع اللي دازت, و اللي ولات تصويرتو معمرة الفيسبوك المغربي, وحتا عدة صفحات أجنبية معروفة, ماكانتش الظروف بسيطة باش وصل لهاد المستوى.

و هو دري صغير عايش ف هولندا, كانت كرة القدم هي الشغف ديالو وكان المستقبل ديالو كيدور عليها. ولكن ف عمر الـ 13 سنة اكتشف أنه مصاب ب Osgood-Schlatter disease (قلب عليه ف كووكل من بعد). هاد المرض هو التهاب كيوقع على مستوى الركبة, أثر ليه على لعبو للكورة وغادي يكون السبب ف عدم التحاقو بفريق AJAX رغم موهبتو.

3 سنين موراها غادي يبدا يخدم ف مطعم إندونيسي كيغسل الطباسل و يسيق الأرض.

هاد القضية عمرها ضايقاتو, بالعكس أمرابط مفتاخر بحياتو كيف ماهي, بل و مزال مفتخر أنه دار خدمة مزيانة ف المطعم و خدا ترقية باش يوجد الديسير تما.

والقراية؟ آه كان كيقرا بالموازاة معا الخدمة. ركز ف القدم وحتا ف القلم, بحيث أنه قرر يكمل قرايتو ف الاقتصاد و التدبير والقانون.

و هو ضابط 4 داللغات :الهولندية, الإنجليزية, الإسبانية و الدارجة الخاصة ديالو طبعا, بلا مانحسبو التركية اللي قال أنه ماعارف فيها غي كليمات.

واخا هادشي, أمرابط ماسمحش ف الكرة, إنما كان كيلعبها كهاو مع SV Huizen قبل مايكتاشفو ناد Omniworld. زوج فرق ديال الهواة ف هولندا. هنا فين غادي تبدا المسيرة ديالو معا كرة القدم فين غايلعب مع عدة أندية قبل مايلعب مع المنتخب الوطني المغربي فين غاتاحلو الفرصة يخدم مع حاجي اللي كان واحد من اللاعبين المفضلين عندو.

أمرابط كيقول بلي الفترة د 19-20 عام من حياتو كانت صعيبة بسباب أنه ماكانش عارف شنو يدير . و الصراحة أننا كاملين دزنا من هاد المواقف و لكن اللي كيهم, وعلى لسان امرابط, “أنك تكون قاد تعطي ف شنو كتدير, وتركز 100% فيه.”

حاجة أخرى, أمرابط عندو أخ سميتو سفيان حتا هو لاعب ديال الكرة. من الواضح أن الكرة كتجريلهم ف الدم بحال هوما كيجريو مور كرة. نتمناو ف 2022 المغرب يتأهل ويكون سفيان حاضر (نور الدين كبر ف السن), باش ندوزو للدور التاني هاد المرة!

خلي صوتك

0 نقطة
Upvote Downvote

Total votes: 0

Upvotes: 0

Upvotes percentage: 0.000000%

Downvotes: 0

Downvotes percentage: 0.000000%

عجبك المقال؟ بارطاجيه وما تنساش تدير J’aime للصفحة ف الفيسبوك!

كومنطي

تعليقات


المزيد ف: كيوت 😍

أهلا!

Sign in

نسيتي المودباس؟

ما عندكش كونط؟ تسجّل

Close
of

Processing files…