علاش القنوات الالمانية كتنقل مباريات كاس العالم مجانا؟ هذو 4 أسباب علاش

جا الوقت تتعلم شوية الالمانية


كاس العالم  روسيا 2018 قريب, وبحال كل تظاهرة كروية كبرى, ملايين المغاربة كيقصدوا القهاوي باش يتفرجوا ف الماتشات. النقل التلفزيوني ديال التظاهرات الكبرى تطور بزاف. اليوم ولات قنوات معينة شارية حقوق النقل الحصري بأثمنة خيالية في غير متناول القنوات المجانية.

ماشي جميع المغاربة قادرين يشتركوا ف القنوات المدفوعة التمن. وماشي كلشي عزاز عليه القهاوي, لذلك كيبقا الحل لبزاف القنوات الالمانية اللي كاينة ف قمر أسترا, واللي, نظرا لموقعهنا الاستراتيجي كيفما قرينا, كتتشد ف المغرب بسهولة.

هاد القنوات الالمانية, تحديدا ZDF (التانية) و Das Erste (الاولى) كتنقل ماتشات كاس العالم لعشرات السنين دابا مجانا. الملايين ديال المغاربة تفرجوا ف ماتشات مهمة فيها. البعض مشا بعيد وبدا يتعلم الالمانية بسببها.

لكن السؤال هو علاش هاد القنوات كتنقل هاد الماتشات فابور رغم أن مناطق اخرى ممنوع على القنوات المجانية تنقل نفس الماتش؟

كاينة عدة أسباب, ف Neooz. لخصناها لكم, هذي أهمها:

1. ما عندهمش تقافة النقل الارضي

ألمانيا من الدول القليلة ف العالم اللي النقل الارضي ما عندهمش تقريبا. النقل الفضائي عندهم هو الرئيسي. كل دار فيها جهاز استقبال فضائي كتشد بيه القنوات المحلية وديال النمسا ولا سويسرا.

القنوات الرسمية مايمكنش تمنع النقل على الفضائي وتطلقو للأرضي فقط. الجهاز الحكومي المكلف بشراء الحقوق كيشريها فضائيا كذلك للألمان فينما كانوا ف العالم, وبأي طريقة بغاو.

2. كيخلصوا الضريبة على داك النقل

التلفزيون الرسمي ف ألمانيا كتصرف عليه فلوس صحيحة. نسبة كبيرة منها كتجي من فلوس الضرائب ديال المواطنين العاديين.

لذلك, أي تظاهرة رياضية كبيرة مشاركة فيها ألمانيا بطريقة أو بأخرى, كيتم نقلها مجانا (مجازيا, لانهم خلصوها ضرائب) للمواطنين على جميع الوسائل (راديو تلفزيون وانترنت). القوانين المحلية كتمنع القنوات الخاصة تدير احتكار للماتشات اللي فيهم فراقي ألمانية.

3. كاينين المان برا

الالمان شعب موهوب ودكي. خدمات الالمان واتقانهم مطلوب ف العالم كلو. لذلك كاينة نسبة لا بأس بيها ديال مواطنين ألمان عايشين برا, خصوصا ف دور أوروبا الجنوبية, فين كتعجبهم الشمش.

الطريقة الوحيدة اللي عندهم باش يتواصلوا مع أخبار وتقافة بلادهم هي التلفازة. النقل الفضائي تحديدا. لذلك القنوات كتاخدهم بعين الاعتبار وكتبث ليهم كلشي فضائيا.

4. سياح بزاف كيدوزا العطلة ف أوروبا

من بعد عام ديال التغوبيش والعمل والجد والكد, ملايين الالمان كيقصدوا دول البحر الابيض المتوسط لقضاء عطلة الصيف.

الملايين كيزوروا سبانيا (ماربيا والكنارياس تحديدا) سنويا. فيها كيدوزا الصيف. هاد السفر جنوبا جزء من التقافة ديال الطبقة الوسطى الالمانية. سبانيا, وباقي دول أوروبا الجنوبية, رخيصة بالنسبة لاقتصادهم وف متناول الجميع. تقدر تقول بحال الشمال ديال الطبقة الوسطى المغربية.

نتيجة لهاد الشي, هاد الملايين خاصهم يتفرجوا ف منتخب بلادهم بلغتهم الام وبتعليق ديالهم ماشي ديال الدولة فين مدوزين العطلة. النقل الفضائي كيبقا الحل المثالي. حنا ف المغرب, وف باقي شمال إفريقيا, جينا ف الطريق وكنقدرو نستافدو من هاد الثغرة.

خلي صوتك

7 نقطة
Upvote Downvote

Total votes: 9

Upvotes: 8

Upvotes percentage: 88.888889%

Downvotes: 1

Downvotes percentage: 11.111111%

عجبك المقال؟ بارطاجيه وما تنساش تدير J’aime للصفحة ف الفيسبوك!

كومنطي

تعليقات


المزيد ف: تيفي 📺

أهلا!

Sign in

نسيتي المودباس؟

ما عندكش كونط؟ تسجّل

Close
of

Processing files…