6 دروس حياتية غادي تتعلمها نهار تعيش بوحدك بعيدا على والديك

مدخلك لعالم الـ adults!


ف مجتمع بحال المغرب, أغلب الشباب المغاربة كيبقاو ساكنين ف دار العائلة حتا للتلاتينات. الاسباب كتتنوع, سواءا عدم القدرة على الاستقلال نظرا للاقتصاد المتواضع, ولا فقط أن الوالدين ماساخيينش بولدهم يخوي الدار ويخليهم بوحدهم. خصوصا ايلا كان هو اللي كيطلع البوطة للطروازيام.

لكن الاستقلال, سواءا كان للخدمة, للقراية, ولا فقط حيت الانسان بغا يخوي الدار, كيعلم الواحد عدة دروس اللي كانت غايبة عليه ملي كان ساكن مع والوديه. حوايج تقدر تبان تافهة, لكن مهمة وغادي تخلق الفارق ف حياتك, وغادي تغيّر شخصيتك للأبد.

1. خاصك تطيّب لراسك كل نهار

أو تاكل ف الزنقة, لكن ماكلة الزنقة غادي تفرع لك الميزانية وتطلع لك ف الراس مع الوقت, وغادي ترجع بالزز منك تتعلم تطيّب.

2. خاصك تصبّن وتنشر

أو تدّيهم للمصبنة, لكن الحالتين بحال بحال. المهم غادي تعرف أن الحوايج كيتصبنوا بمجهود ماشي كنلوحوهم ف الصالون وكنلقاوهم تصبنوا بطريقة سحرية ملي نرجعو ليهم!

3. غادي تتعلم التجفاف والتسياق

غالبا علاقتك الوحيدة بالتسياق والتجفاف هي جملة “ما تدوزش من هنا راني كنسيّق“. نهار غادي تسكن بوحدك غادي تولي حتا نتا تقولها بالزز منك. وغادي تعرف علاش الام المغربية, أو الاخت, ممكن تقتل ادا دزتي من قدامها وهي كتسيّق!

4. عمرك ما غادي تزيد تنسا الزبل

وفي حالة ما نسيتيه غادي تشم ريحتو من الزنقة وغادي تتضوبل خدمتك. غادي تخرجو وترجع تسيّق وتجفف وتحيد داك الريحة العطرة اللي دار!

5. غادي يولي عندك حس المسؤولية

وغادي تولي تعرف حتا نهار يجو الضو والما غاليين وتدير بحسابهم وما تبقاش تبيت التلفازة والـ PC شاعلين.

6. غادي تولي تعرف الخضرة بشحال كتدير

هل تعلم أن الخضرة ما كتبنتش ف الكوزينة؟ أقسم بالله ما كنكدب عليك!

الخضرة كتشرا تقريبا كل  صيمانة, وكتتباع بالكيلو ماشي بالواحدة. أتمانها كتتراوح ما بين عدة دراهم حتا لشعرات الدراهم حسب الموسم ونوع الخضرة.

نهار تسكن بوحدة وتبغي تطيب, غادي تتعرف على عالم الخضرة. وغادي تتعلم كذلك كيفاش تختار الخضرة المزيانة اللي ما مضروباش.

خلي صوتك

3 نقطة
Upvote Downvote

Total votes: 3

Upvotes: 3

Upvotes percentage: 100.000000%

Downvotes: 0

Downvotes percentage: 0.000000%

عجبك المقال؟ بارطاجيه وما تنساش تدير J’aime للصفحة ف الفيسبوك!

كومنطي

تعليقات


المزيد ف: ليستة 📋

أهلا!

Sign in

نسيتي المودباس؟

ما عندكش كونط؟ تسجّل

Close
of

Processing files…