جامعة محمد الخامس دايرة دروس ف المحاسبة أونلاين فابور — وتقدر تاخد شهادة

ادا كنتي معكاز تمشي تقرا


التعليم كيتطور مع الوقت بسرعة. خصوصا مع ثورة التكنولوجيا, طرق التعليم والتعلم ما بقاتش محصورة على المدارس والجامعات اللي عبارة عن 4 حيوط. بل ولات كاينة دروس بالملايين متوفرة دابا أونلاين ف جميع المجالات تقدر توصل لها ونتا مريح ف دارك.

جامعة محمد الخامس ديال الرباط حتا هي كتحاول تساير التطور التكنولوجي. الجامعة دارت MOOC ديالها أونلاين للناس اللي بغاو يتعلموا مواد معينة –المحاسبة فقط حاليا– بلا ما يلتحقوا بالجامعة. الدروس متوفرة على موقع الجامعة مع شروط التسجيل وباقي التفاصيل.

الـ MOOC هو تعبير انجليزي اختصار لـ Massive open online course, اللي نقدروا نترجموها للعربية بـ دورة تعليمية أونلاين مفتوحة المصدر. أو بتعبير أبسط: دورة تعليمية أونلاين.

الـ MOOC كتتبع نفس اسلوب المحاضرات ف الجامعة. كتكون بالتسجيل والدروس كتتلاح على فترات ومنية محددة مسبقا, وماشي دقة واحدة. من بعد ما كتكملها كتاخد امتحان كيختبر مدى استفادتك.

عشرات الجامعات الامريكية والاروبية لايحة ديجا مئات الدورات التعليمية. الدومين ف أمريكا وأوروبا كيعرف ثورة ف السنوات الاخيرة.

شنو غادي يخليني نخلّي عشرات مواقع الـ MOOC الأمريكية ونتبع دروس جامعة محمد الخامس؟

هذا سؤال غادي يكون جاك لراسك ملي قريتي العنوان. well, كاينين 2 أسباب رئيسية علاش هاد الـ MOOC كيتفوق على باقي الـ MOOCs.

السبب الاول هو أن المواد اللي كتقرا ف الـ MOOC ديال محمد الخامس كتتقرا حسب النظام المغربي اللي مستعمل ف سوق الشغل المحلي. غادي تشوف أمثلة وتشوف معلومات اللي من السياق المغربي, عكس الدروس الامريكية, اللي واخا أحسن تقنيا, لكن مديورة لسياق مختلف تماما على اللي غادي تحتك بيه ف خدمتك.

ثانيا, من بعد الـ Test اللي كتدير ف الموقع, ادا جبتي أكثر من 50%, كتقدر تمشي للجامعة تدوز امتحان كتابي, وادا نجحتي فيه (التنقيط على 20) كتاخد اعتراف مسني من طرف رئيس الجامعة, اللي تقدر من بعد تزيدو ف الـ CV ديالك. هاد القضية صعيبة شوية تديرها باستعمال MOOC أمريكي, باستثناء ادا غادي تخلص.

خلي صوتك

2 نقط
Upvote Downvote

Total votes: 2

Upvotes: 2

Upvotes percentage: 100.000000%

Downvotes: 0

Downvotes percentage: 0.000000%

عجبك المقال؟ بارطاجيه وما تنساش تدير J’aime للصفحة ف الفيسبوك!

كومنطي

تعليقات


المزيد ف: #NeoozProTips

أهلا!

Sign in

نسيتي المودباس؟

ما عندكش كونط؟ تسجّل

Close
of

Processing files…