الـ TGV قريبا غادي يبدا الخدمة — هذي أتمنة التداكر

أخيرا غادي تقدر تزور طنجة/كازا ف نفس النهار!


من المقرر يتم هاد الصيف (ديال 2018)  البدء ف الاستعمال التجاري لأول TGV –قطار فائق السرعة– ف إفريقيا ف المغرب. واللي غادي يربط بين طنجة والعاصمة الاقتصادية ديال المغرب الدار البيضاء.

الـ TGV ديجا تدارت عليه تجارب ووصلت سرعتو لـ 352 كيلومتر ف الساعة. الاشغال مشات على ما يرام ومن المقرر يبدا الخدمة بلا أي تأخير.

الاستغلال التجاري للقطار غادي يبدا هاد الصيف. مازال ما تمش الاعلان عن التاريخ بالضبط لحد الان, لكن غادي يكون ف شهر 6 مع كاس العالم.

الـ TGV –اللي تم الاعلان عليه عام 2007— غادي يربط كازا بطنجة ف 2 ساعات و10دقايق بدل 5 سوايع, بسرعة 320 كيلومتر ف الساعة. غادي تولي تسافر من كازا لطنجة ف نفس النهار تشوف صحابك ولا تقضي شغلك وترجع, عكس دابا, اللي خاصك 10 سوايع غير ف الطريق.

وهاد الشي بشحال؟ حسب موقع ميديا 24 تمن الاستغلال التجاري ما غاديش يكون محدد مسبقا بحال دابا. الـ TGV غادي يخدم بنظام مغاير معروف باسم Yield Management. تمن التداكر غادي يتحدد أوتوماتيكيا مع إنطلاق كل رحلة بناءا على عدة معطيات, منها الوقت ونسبة ملئ العربات. تقريبا بحال الشكل اللي خدامة بيه الخطوط الجوية ف تحديد الاسعار ديال الرحلات.

حسب موقع Echotechno الفرنسي, التمن ديال التداكر غادي يكون ف حدود 12 أورو تماشيا مع القدرة الشرائية ديال المغاربة. 12 أورو ما نقدروش نعرفو شحال غادي تسوى من هنا لنهار يبدا الـ TGV ف الصيف, لكن ف أسوء الحالات ما غاديش تتجاوز 150 درهم.

150 درهم غادي يكون هو تمن التدكرة –ف المعدل– ما بين كازا وطنجة. تمن رخيص نسبيا مع الاخد بعين الاعتبار الوقت المستغرق ف الرحلة, والتمن الحالي ديال الرحلات بالتران.

من بين الاسباب هو أن ONCF باغية الـ TGV يلقا نجاح ويكون ف متناول الجميع. الهدف ديال المكتب الشريف للسكك الحديدة هو 6 ملايين مسافر ف السنة.

من هنا لتما, نتمناو الامور تمشي على ما يرام والتمن ما يفوتش 200 درهم, والاهم من هاد الشي كلو, ما يكونش فيه الروطار بحال التران العادي!

خلي صوتك

0 نقطة
Upvote Downvote

Total votes: 0

Upvotes: 0

Upvotes percentage: 0.000000%

Downvotes: 0

Downvotes percentage: 0.000000%

كومنطي

تعليقات


المزيد ف: #NeoozProTips

أهلا!

Sign in

نسيتي المودباس؟

ما عندكش كونط؟ تسجّل

Close
of

Processing files…