هاد المغربي ولّى مالك لواحد من أعرق الاندية ف بريطانيا

ومن حقنا نفتخرو بولد بلادنا!


في عالم الكرة الإحترافي، ولفنا نسمعوا سميات مغربية متألقة في وسط التيران مع فراقيها، و لكن ما عمرنا سمعنا بفريق أوروبي خلق الحدث بالمالك دياله المغربي.

الأسبوع الفايت، المغربي عبد الله المسڭم، تمكن من شراء النادي الإنجليزي العريق Oldham Athletic FC، اللي تأسس سنة 1895 و اللي كيمارس حاليا ف الدرجة الإنجليزية الأولى. و هذا الخبر خلق الحدث في الدرجة الأولى الإنجليزية، و أعطاتو الصحافة الإنجليزية إهتمام كبير.

صفقة شراء النادي تمت بعد شهور من المفاوضات بين المغربي المسڭم و المالك السابق سيمون كورني، اللي صرح بأنه لقى في السي المسڭم الشخص المناسب لقيادة النادي لما هو أحسن، و كيآمن باللي السي المسڭم عنده ما يكفي من الموارد و الكفاءة و المعارف باش يحسن النادي.

تصريح الرئيس السابق ما شي غير مجاملة حيث المسڭم هو عارف بمجال كرة القدم، بحيث أنه وكيل أعمال عدد من اللاعبين و كيمتلك شركة خدامة في هذا المجال إسميتها “2JLT “، و سبق لها تمثيل لاعبين بحال سولي مونتاري لاعب الميلان، جونينيو لاعب أولمبيك ليون، ميركو ڤوكينيتش لاعب اليوفينوس…) و من بين الأسماء اللي كنلقاووا فايت خدم معهم كنلقاووا حتى أسماء مغاربة بحال يوسف حجي و الحسين خرجة و عثمان العساس.

هاد الإرتباط العملي اللي عند عبد الله المسڭم مع المغرب، ما كينحصرش غير في تمثيل اللاعبين بوحده، بحيث في 2012 جلب مستثمرين لإفتتاح أكاديمية JMG بجهة ماسة، و هي أكاديمية خاصة لكرة القدم الهدف منها حسب تصريحه هو تكوين لاعبين مغاربة قادرين يلعبوا في الدوريات الأوروبية.

و لكن رغم هذه الخبرات كلها فأول تصريح بعد موافقة الجامعة الإنجيزية على شراءه للنادي، صرح باللي كيتفهم تساؤلات الجامعة الإنجليزية، حيث ما شي من السهل التحول من وكيل للاعبين لمالك نادي، اللي –الجامعة– كتحاول حماية اللعبة فقط.

و صرح عاود ثاني باللي هذا التحدي جديد، بالنسبة له، و باللي محتاج دعم الجمهور حيث جاي برؤية جديدة للنادي.

حاليا النادي Oldham Athletic FC كيعاني في دوري الدرجة الأولى الإنجليزية، محتل الرتبة 22 في منافسة مع 25 فريق. و لكن الجمهور يتسم خيرا في الرئيس الجديد، و كيتمناووا يستغل علاقاته في عالم الكرة لتحسين وضعية الفريق و علاش لا يرجعه لمجد عاشه في بداية القرن عشرين منين ربحوا الدوري الإنجليزي عام 1915.

خاصة أن العلامات تبشر بالخير، بحيث ما دازش بزاف ديال اوقت على توليه الرئاسة ديال النادي حتى أعلن على تعاقده مع لاعبين من نانت الفرنسي، و هي صفقة شكلت مفاجئة خاصة أنهم جايين من أحد أفضل مراكز التكوين الفرنسية/الأوروبية، باش يمارسوا في الدرجة الإنجليزية الأولى.

واخا ما عندوش فلوس الخليج، و لكن كنتمناووا لعبد الله المسڭم النجاح كأول مغربي يمتلك نادي إحترافي في أوروبا، واخا صعيب الحال تولي بحال مانشستر سيتي أو باريس سان جيرمان، و لكن شكون عرف بالإستثمارات المناسبة ممكن لهذا الفريق بشوية بشوية يتطور و يولي تجربة كروية ناجحة، تعطي سمعة للمغارفة ما شي غير فوق التيران و لكن حتى في التسيير.

هذا فيديو استقبال الرئيس الجديد من طرف الجمهور على أرضية الملعب:

خلي صوتك

0 نقطة
Upvote Downvote

Total votes: 0

Upvotes: 0

Upvotes percentage: 0.000000%

Downvotes: 0

Downvotes percentage: 0.000000%

كومنطي

تعليقات


المزيد ف: كيوت 😍

أهلا!

Sign in

نسيتي المودباس؟

ما عندكش كونط؟ تسجّل

Close
of

Processing files…