Danny Trejo: علاش ديما كيمتل دور المجرم القبيح؟

هذي قصتو وعلاش أدوارو كلها بحال بحال!


بلا شك هاد الوجه عندك مألوف من الافلام. Danny Trejo هو أكثر وجه مكسيكي مشهور بالجريمة والعنف ف هوليوود. تقريبا كل أدوارو كيلعب فيها مجرم حبّاس لاتيني قبيح وكلو عامر وشام. فقط وجهو ممكن يدخّل الرعب ف قلبك!

داني تريخو اليوم عندو 300 فيلم وعمل فني ف رصيدو. بالإضافة لسلسلة مطاعم فاخرة ف لوس أنجلس.

ف الحقيقة، تشبت داني بهاد الدور بالتحديد ما جاش عبثا.

داني تريخو كان فعلا مجرم حباس وقبيح!

هذا هو الدور اللي كيتقن مزيان. فترة الستينات كلها دوزها ف الحبس ومشاكل.

ف شبابو قبل ما يدخل للسينما، داني تريخو، 73 عام حاليا، داز من أغلب الإصلاحيات ف كاليفورنيا. دوّز 11 عام من حياتو ف الحبس على فترات.

التهم تنوعت ما بين السرقة تحت تهديد السلاح، الضرب، وتهم متعلقة بالمخدرات. الهدف منها كان باش يشري المخدرات اللي كان مدمن عليها.

حتا داخل الحبس، داني ما تغيرش، كان ديما جابد الصداع ومضارب مع باقي النزلاء، نظرا لممارستو البوكس. ديما سالخ شي نزيل معاه.

سجلو الاجرامي غادي يوصل الذروة ديالو ملي غادي يضرب lieutenant بحجرة للراس خلال انفلات أمني ف الحبس اللي كان فيه.

غادي يتحط ف السجن الانفرادي، وغادي يواجه حكم الاعدام في حالة تبوث التهمة ضدو.

ضربتو ولكن ما كنتش قاصدو هو. كنت باغي نضرب واحد الكليكة

ضربتو ولكن ما كنتش قاصدو هو. كنت باغي نضرب واحد الكليكة“, كيقول حول الحادثة.

لحسن الحظ ولغياب الشهود، داني غادي ينجو من الاعدام ف اخر دقيقة بأعجوبة. حتا بدا يستعد نفسيا للموت.

من بعد انتهاء مدة السجن، ونتيجة لتجربة النجاة من الاعدام، تريخو غادي يدير عقلو ويقرر يقطع الشراب والمخدرات ويبدا حياة جديدة.

غادي يلتحق بمؤسسة ديال الاقلاع عن المخدرات. غادي يخدم مع المراهقين المدمنين باعتبارو مدمن سابق.

غادي تمشي الايام حتا لعام 1985، ملي شاب كان عاونو على الاقلاع عن المخدرات غادي يتصل بيه، “تريخو، كاين الغبرة بزاف هنا فين خدام. بغيتك تجي عندي تعاوني نبقا بعيد على هاد الشي”.

تريخو فجأة كتشف راسو ف مكان تصوير فيلم. الشاب اللي عيطلو خدام ممتل ف فيلم Runaway Train .

ف التمانينات، حسب ما كيقول داني، الكوكايين كان عادي جدا ف أماكن التصوير ف هوليوود.

طبعا، بملامحو الخاسرة تطلب منو ف الحين يدير دور مجرم ف الفيلم اللي عاد وصل لمكان تصويرو. تواني من بعد ما زول التيشرت، شخص جا من بعيد كيغوت “داني تريخو!”.

الـ Screenwriter عقل عليه من نهار شافو خلال كومبا ف الحبس. بالزربة عرفو من ملامحو والتاتوز على وجهو.

داني تعطاه دور يدرب بطل الفيلم على البوكس, الممتل Eric Roberts.

من بعد هاد الفيلم داني ما تزقفش على التمثيل. فيلم ورا فيلم، لكن كان ديما كيلعب دور مجرم عشوائي ولا حباس مجهول الاسم، حتا لفيلم Death Wish 4 اللي غادي يلعب فيه دور كامل وسميتو غادي تبان ف اخر الفيلم.

لحد اليوم داني مازال كيزور المدارس ف أمريكا ويقدم نصائح للمراهقين، اللي أهمها:

”حيّد الشراب والمخدرات من حياتك وحياتك غادي تتحسن!“

خلي صوتك

0 نقطة
Upvote Downvote

Total votes: 0

Upvotes: 0

Upvotes percentage: 0.000000%

Downvotes: 0

Downvotes percentage: 0.000000%

عجبك المقال؟ بارطاجيه وما تنساش تدير J’aime للصفحة ف الفيسبوك!

كومنطي

تعليقات


المزيد ف: سينما 📽

أهلا!

Sign in

نسيتي المودباس؟

ما عندكش كونط؟ تسجّل

Close
of

Processing files…