علاش أصلا سميتو الـBlack Friday؟

نو, ما عندو حتا علاقة بشي كارثة


بلا شك كلمة Black Friday طلعات لك ف راسك دابا. غالبا شفتيها مئات المرات ف الصوشل ميديا هاد اليومين اللي فاتوا.

البلاك فرايداي بدا كينتشر ف المغرب ف السنين الاخيرة مع تطور الصوشل ميديا والتجارة الالكترونية. على أرض الواقع مازال قليل بزاف.

تجاريا, البلاك فرايداي هو داك النهار ف العام اللي المحلات التجارية كتهبط أتمان السلع ديالها بشكل كبير بزاف, باش تجيب الزبائن.

بحالنا, حتا نتا غادي تكون تسائلتي على معنى Black Friday اللغوي والتاريخي, وعلاش كحل وماشي خوخي, وعلاش الجمعة وماشي التلات مثلا.

الـ Black ما كتشيرش –كيفما كنا كنظنو– لشي حاجة سوداوية ولا سلبية, بل بالعكس, جاية من تعبير be in the black, واللي تعبير تجاري معناه أنك تربح من بعد خسارة طويلة.

الـ Black هنا ما عندو علاقة بداك الاسود اللي كنطلقوها على الايام اللي كتوقع فيها كوارث ولا حوادث مؤلمة.

كما أن البلاك فرايداي تقليد أمريكي بالدرجة الاولى, ماشي بريطاني. من أمريكا انتشر ف العالم عن طريق اعلامها وتقافتها.

أما السبب علاش الجمعة بالضبط فالامر متعلق بعيد الـ Thanksgiving (عيد الشكر). عيد كيحتفلوا بيه الامريكيين نهار الخميس الرابع من كل شهر 11 ف العام وكيدبحوا الديك الرومي.

النهار اللي موراه, الجمعة, كيكون روبو, المواطنيني الامريكيين المعيدين كيغتنموا الفرصة باش يديروا الشوبين. المحلات التجارية حتا هي كتستغل هاد الفرصة وتدير تخفيضات خيالية باش تجدب الزبائن اللي منتشيين بالعيد والروبو من الخدمة.

طبعا, ما كانش الاسم الحالي على هاد التخفيضات. كانت فقط تخفيضات عفوية. الاسم والظاهرة خدات المنحى والشهرة الحالية حتا للتمانينات.

كاين نظريات اخرى على كيفاش الاسم بدا, منها اللي كيرجع حتا لعام 1869, فين 2 مستثمرين من وول ستريت, Jay Gould و Jim Fisk, قرروا يشريو أكبر قدر من الدهب ف البلاد باش يعليو السعر, ومن بعد يبيعوه بتمن غالي.

نهار الجمعة من شتنبر من نفس العام, المؤامرة ديالهم تكشفت, الشي اللي غادي يأدي لانهاير البورصة, وبالتالي أول استعمال لاسم Black Friday مسجل ف التاريخ.

فرضيات اخرى انتشرت أونلاين ف السنين الماضية كتربط التعبير  بالعبودية والبيع والشرا ف العبيد, لكن ف الواقع مجرد اشاعات, وماشي صحيحة.

 

عجبك المقال؟ Supportـينا بلايك لصفحتنا من هنا

خلي صوتك

0 نقطة
Upvote Downvote

Total votes: 0

Upvotes: 0

Upvotes percentage: 0.000000%

Downvotes: 0

Downvotes percentage: 0.000000%

كومنطي

تعليقات


المزيد ف: #NeoozProTips

أهلا!

Sign in

نسيتي المودباس؟

ما عندكش كونط؟ تسجّل

Close
of

Processing files…