5 حوايج ما يعرفوها غير ناس الشمال

أو اللي عاشوا ف الشمال بزاف


الزوين ف المغرب, هو أنه واخا صغير ولكن فيه ثقافات ولهجات واثنيات بزاف. شلى ما تكتشف وما تعرف. كل منطقة عندها خصوصيتها والحوايج اللي كيميزوها على باقي المناطق.

ف هاد المقال غادي نمشيو للشمال. هذي لائحة بأكثر 5 حوايج غادي يعرفوها غير سكان هاد المنطقة:

 

1. الاذاعات الاسبانية

طبعا ما يمكنش نهضرو على الشمال بلا ما نهضرو على الاعلام الاسباني.

خصوصا قبل تطور وخوصصة الاعلام السمعي البصري ف المغرب, كان القنوات والاداعات الاسبانية هي الوسيلة المفضلة لعند ملايين الناس ف شمال المغرب. كانت بديل للقنوات والاداعات المغربية المعدودة على رؤوس الاصابع, والرديئة من ناحية الجودة.

اللي كبر وعاش ف الشمال, غادي يكون عارف تقريبا جميع القنوات والاذاعات ديال سبانيا ولما لا عارف حتا برامجها وتوقيتها.

2. الكانارياس ناقصين ساعة على سبانيا

وبما أن القنوات والاداعات الاسبانية عليها اقبال, ضروري ما يلاحظ الانسان معلومة كتتكرر تقريبا كل ساعة, وهي التوقيت.

سبانيا توقيتها فايت المغرب بساعة, لكن جزر الكناري توقيتها نفس توقيت المغرب.

3. الـ Corte Ingles هو مرجان ديال سبانيا

نظرا لان ناس بزاف كيمشو لسبتة ومليلية يتقضاو المواد الغذائية, ميكات الـ  Corte Ingles –أكبر سوق ممتاز ف سبانيا– منتشرة بشكل كبير. أحيانا أكثر حتا من الاسواق المغربية الكبرى.

داك المتلت الخضر ودوك الكلمات المكتوبة بداك الخط, غالبا ماغاديش تكون غريبة عليك.

4. الزريعة Pipas

 

عكس الزريعة البلدية اللي كاينة ف أغلب مناطق المغرب, ف الشمال النوع “الرومي” (ان صح التعبير) ديال الزريعة هو المنتشر.

أنواع بزاف ديال هاد الزريعة كتتباع ف باكيات بلاستيكية صغيرة عامرة ألوان فاتحة ورسوم مدهشة بالنسبة للاطفال!

5. البسكوي ديال María Dorada

 

 بسكوي ماريا, أو بسكويت مريم, هو نوع (ماشي ماركة) ديال البسكوي دائري الشكل جاف, ف المغرب منتشر بزاف تحت إسم María Dorada ديال سبانيا.

ايلا كبرتي ف الشمال, غادي تكون كليتيه كثر من Henry’s نظرا لانه متوفر بشكل كبير ورخيص, وغادي تكون عاقل على داك الوجه ديال الشمش الدهبية.

 

مازال كاينة شي حاجة خاصة بالشمال ونسيناها؟ زدهالنا ف التعليقات!

 

عجبك المقال؟ Supportـينا بلايك للصفحة ديالنا من هنا!

خلي صوتك

0 نقطة
Upvote Downvote

Total votes: 0

Upvotes: 0

Upvotes percentage: 0.000000%

Downvotes: 0

Downvotes percentage: 0.000000%

كومنطي

تعليقات


المزيد ف: ليستة 📋

أهلا!

Sign in

نسيتي المودباس؟

ما عندكش كونط؟ تسجّل

Close
of

Processing files…