الـ Net Neutrality: شنو هي وعلاش كلشي كيهضر عليها؟

وعلاش خاصك تساندها كمستخدم للأنترنت؟


ايلا دخلتي مؤخرا ل imgur, بحالنا, غادي تكون لاحظتي بانر ف راس الصفحة كيدعوك للدفاع على الـ Net neutrality.

أو يمكن شفتي بانر مشابه ف مواقع أخرى في حالة ما ما كنتيش من مستعملي امدجر.

لكن السؤال اللي كيطرح راسو بقوة لبزاف هو شنو هو أصلا هاد النت نوتشرالدي وعلاش هاد صداع الراس؟

 

النت نتشرالدي بالعربية هي حيادية الانترنت, والمقصود بيها ان الانترنت يبقا محايد.

الحياد ف هاد السياق ماشي هو الحياد ف السياسة ولا الرأي, وإنما الحياد ف سرعة/جودة الوصول للخدمات على الانترنت.

المشكل بدا ملي شركات أنترنت أمريكية بغات تفضل مواقع (اللي غادي تخلصها) على مواقع أخرى ف سرعة الولوج ليها على الانترنت.

أي تولي المواقع الكبيرة تخلص شركات تزويد الانترنت باش مواقعهم تكون سرعة الوصول ليها أعلى من باقي المواقع, بغض النظر على سرعة انترنت المستخدم.

سواءا عندك فيبر ديال 100 ميغا ولا غير 3G ما كتفوتش 1 ميغا, ملي تدخل للموقع المقصود, سرعة الانترنت غادي ترتفع عندك نظريا.

بتعبير أبسط وف السياق المغربي باش توصلك الفكرة أسرع:

Avito تولي تخلص مزود الانترنت إتصالات المغرب باش ملي المواطن المغربي يدخل لموقعهم سرعتو تولي 20 ميكا ف التانية.

بينما ملي يحل Tab حداها ف نفس اللحظة ويحل اليوتوب, مثلا, السرعة ترجع فقط 2 ميغا للتانية اللي عندو.

حيادية الانترنت كتعني كذلك عدم فرض الحكومة ولا الشركات رسوم إضافية على استخدامك لأي محتوى أو خدمة أونلاين.

ما من حقش اتصالات المغرب, مثلا, تفرض عليك تخلص بشحال من فيديو يوتوب تفرجتي فيه.

بالاضافة لعدم أحقيتها بمنع خدمة معينة حيت كتنافس منتوج ديالها (مكالمات الواتساب والفيسبوك مثلا).

عدم حيادية الانترنت فيها ضرب للمنافسة الشريفة وخرق للحيادية ديال الانترنت. وفيها كذلك حتا تأثير على الخيارات المقدمة ليك.

الحيادية ديال الانترنت شي حاجة مهمة بزاف للابداع وحتا للربح.

مواقع وخدمات ربحية بزاف مهمة كتدافع عليها, بحال Amazon, Netflix, Spoify وزيد وزيد من المواقع اللي عندهم كلمتهم ف الانترنت.

ببساطة ما بغاوش مزودي الانترنت يستغلوهم ويفرضوا عليهم وعليك رسوم إضافية لخدمة نتا من حقك توصل لها فابور مادام كتخلص الانترنت راس كل شهر.

اليوم ف الميريكان, وكيفما كيقول البانر ف imgur, هو اليوم السنوي لمساندة حيادية الانترنت.

اليوم, كيتم إرسال توقيعات لـ FCC, اللي هي الوكالة الحكومية المختصة ف تنظيم سوق الاتصالات, من أجل رفض الفكرة على موقع www.battleforthenet.com.

من جهتك نتا كمستهلك, من حقك سرعة جيدة للولوج لجميع المواقع بالطريقة اللي بغيتي الوقت اللي بغيتي!

ماشي فقط المواقع اللي قادرة تخلص الملايين لشركة الاتصالات, وماشي فقط الخدمات اللي بغاو.

عدم حيادية الانترنت بطريقة غير مباشرة كيتحكم لك ف اش تشوف وآش تقرا, وبالتالي كترجع لعصر ما قبل الانترنت.

التشيلي كانت أول دولة ف العالم تفرض قانون حيادية الانترنت.

عام 2003 تدار قانون كيمنع الشركات المزودة للانترنت تفرض رسوم إضافية ولا تمنع خدمات معينة, أو حتا تتحكم ف الديبي اللي كيوصلك ملي تدخل لموقع معين. كتخلص قدر معين ديال الفلوس لديبي معين, دير بيه اللي بغيتي الوقت اللي بغيتي.

 هذا تفسير من عند مستعمل ديال imgur بالتصاور:

 

تحديث: نهار 14 دجنبر 2017 الـ FCC  صوتت لإلغاء الـ Net neutrality. 

خلي صوتك

19 نقطة
Upvote Downvote

Total votes: 27

Upvotes: 23

Upvotes percentage: 85.185185%

Downvotes: 4

Downvotes percentage: 14.814815%

كومنطي

تعليقات


المزيد ف: تك

أهلا!

Sign in

نسيتي المودباس؟

ما عندكش كونط؟ تسجّل

Close
of

Processing files…