علاش المغرب زاد الساعة الاضافية؟

وعلاش أصلا كيزيدوها؟


البارح بالليل من 2 المغرب زاد الساعة الإضافية لتوقيت كرينتش اللي خدام بيه على طول العام.

هاد الساعة الاضافية كتتسما التوقيت الصيفي, أو Daylight saving time باش نكونو أكثر دقة.

وبحال أي قرار, كاينين ناس اللي مع واللي ضد. المهم حنا غادي نعطيوكم معلومات بسيطة ونتوما تحكموا لراسكم!

شنو هو التوقيت الصيفي؟
الدول اللي الزرق كتعتمد التوقيت الصيفي بشكل دوري.

التوقيت الصيفي باختصار هو إضافة 60 دقيقة للساعة ملي يدخل فصل الربيع. التوقيت الصيفيةماشي جديد, كاين من وقت الامبراطورية الرومانية. لكن كان عندهم بشكل مختلف.

باش يتخلصوا من مشكل اختلاف طول النهار, كانت عندهم الساعة ف الشتا فيها 45 دقيقة, وف الصيف 75 دقيقة.

علاش كاين التوقيت الصيفي؟

التوقيت الصيفي الهدف منو هو أن الناس يستافدو من الضو ديال الشمش ما أمكن. ملي كيدخل الربيع زاوية دوران الكرة الارضية كيختلف وكتختلف معاها كذلك ساعات ضو الشمش ف الكرة الارضية. كتولي الشمش تشرق بكري وتغرب بكري.

الناس الكبار ف المغرب — واخا ما قاريينش– لاحظوا هاد القضية من زمان.

وغالبا غادي تسمعهم كيقولوا “النهار طوال/النهار قصار”, ف إشارة لضو الشمش والمدة اللي كيستغرق ف النهار.

تقدر تلاحظها حتا ف الشمش مع ال6 ديال العشية ملي كتخرج من المدرسة ولا الخدمة. ضو الشمش كيولي محصور ف ساعات قليلة ف النهار. طبعا هذا ف الشتا. لكن ف الربيع كتوقع ظاهرة مشابهة.

باش الدول تقتصد وما يوليوش الناس كيخرجوا من الخدمة وكيديروا أنشطتهم بالليل, كتزيد ستين دقيقة. باش بدل ما تخرج مع ال6 والليل بدا يطيح, كتخرج مع ال5 (اللي ولات ال6 الجديدة) ومازال كاينة أشعة الشمش.

علاش المغرب داروا؟

ف المغرب النهار ضو الشمش كيستمر لساعات كافية على طول العام تقريبا, باستثناء أشهر قليلة ف الشتا (واللي حتا ف الصباح كتشرق الشمش متأخرة).

أغلب العام الشمش كتشرق ف وقت مناسب وكتغرب ف وقت مناسب, ما كتمشي للخدمة/المدرسة ف الظلام, ما كترجع منهم ف الليل.

وعكس أوروبا الشمالية, الشمش كتشرق عندنا ما بين 2400 حتا لـ 3600 ساعة ف العام. من أكثر المناطق اللي كتشرق فيها الشمش ف العالم, باستثناء الصحراء الكبرى وبعض المناطق الصحراوية ف أمريكا.

مشكل الضو ديال النهار ما عندناش. عكس بريطانيا مثلا اللي كتعتمد حتا هي التوقيت الصيفي, واللي ساعات شروق الشمش بالنهار كتعرف عندها تغير كبير حسب الفصول.

السبب المنطقية الوحيد لإعتماد المغرب للتوقيت الصيفي كيبقا مسايرة الشركاء الاقتصاديين للبلاد (دول أوروبا تحديدا) اللي كيزيدوا حتا هوما ساعة إضافية.

واش التوقيت الصيفي حاجة مزيانة؟

مزيان وخايب حوايج نسبية.

لكن دراسات وأراء بزاف كتقول أن التوقيت الصيفي ممكن يكون مضر لصحة الانسان, وأنه غير نافع إقتصاديا عكس ما كيقولوا الناس الداعيين ليه.

خلي صوتك

18 نقطة
Upvote Downvote

Total votes: 18

Upvotes: 18

Upvotes percentage: 100.000000%

Downvotes: 0

Downvotes percentage: 0.000000%

عجبك المقال؟ بارطاجيه وما تنساش تدير J’aime للصفحة ف الفيسبوك!

كومنطي

تعليقات

المزيد ف: صاينص، بيتش! 🔬

أهلا!

Sign in

نسيتي المودباس؟

ما عندكش كونط؟ تسجّل

Close
of

Processing files…