أفضل 6 مواقع MOOC فين تقدر تتعلم تقريبا أي حاجة هاد الصيف

بلا ما تنوض من بلاصتك!


Want create site? Find Free WordPress Themes and plugins.

الصيف هذا, غالبا كملتي امتحاناتك (أو شديتي الكونجي) وعندك دابا الوقت الكافي للسفر والانترنت. كشاب ما بين 17 واواخر التلاثينات, مازال عندك الرغبة (والحاجة) تتعلم حوايج جديدة ف حياتك, سواءا لقرايتك, ولا من أجل الخدمة, خصوصا ادا كانت ف مجال تنافسي. هنا فين كيجي الـ MOOC.

هذي لائحة مختصرة بأفضل 6 مواقع MOOC

هذي لائحة مختصرة بأفضل 6 مواقع MOOC فين تقدر تتعلم حوايج اللي غادي تعاونك ف قرايتك وخدمتك.

الـ MOOC هي الحروف الاولى من Massive Online Open Courses, واللي مقصود بيها كورسات أونلاين مفتوحة وموجهة للاستعمال الجماعي.

1. Khan Academy

الموقع الاول هو الموقع الغني عن التعريف خان أكادمي.

أكاديمية خان هو مشروع غير ربحي من تأسيس شاب أمريكي من أصل بنغلاديشي عام 2006. الهدف ديالو هو تقريب المدرسة للجميع.

خان أكادمي كتركز ف المواضيع اللي كتتقرا ف التانوي. من الماط حتا للتاريخ. الدروس كتتلاح على شكل فيديوات قصيرة ف قناتهم على اليوتوب. واللي تقدر تلقاها كذلك على موقع المؤسسة.

فييديوات خان أكادمي مبسطة باش تناسب جميع الاعمار والمستويات, ومجانية كليا وتقدر تعاود تستعملها ف مشاريع تعليمية ديالك.

2. Coursera

 

بأكثر من 24 مليون مستعمل مسجل, و2000 كورس احترافي من جامعات بحال يال وستانفورد, كورسيرا أول عنوان خاصك تزورو ايلا بغيتي تتعلم أونلاين.

الكورسات كتشمل جميع المجالات الدراسية اللي ممكن تتخيل, من تعلم اللغة الصينية حتا لنظم التشفير والذكاء الاصطناعي.

الكورسات فيديو ونص أحيانا. أغلب الفيديوات فيهم الـSubtitles للناس اللي لغتهم الانجليزية ماشي متقدمة.

الموقع عندو شراكة مع 150 جامعة ومؤسسة, من 29 دولة حول العالم.

3. Udemy

يوديمي (u اشارة لyou, و demy لـ Academy) هو بلاتفورم تعليمي فيه كورسات ف عدة مجالات موجهة بالدرجة الاولى للبالغين.

الفرق بينو وبين باقي المواقع هو أنه فيه كورسات بالفلوس, بالاضافة لكورسات مجانية.

التمن ديال الكورس كيبدا من 10 دولار (حوالي 100 درهم). طبعا التمن غالي شوية بالنسبة لأغلب الطلبة المغاربة, ولكن ممكن هاد الشي يكون محفز باش ما تتلهاش ف الفيسبوك وتنسا الكورس.

اللي كيميز يوديمي هو أنه تقدر حتا نتا –ادا عندك خبرة ف مجال ما– تولي كتدير دروس ف الموقع وتتخلص عليها (من بعد ما تتوفر فيك جميع الشروط طبعا).

4. edX

ايديكس من أقوى المواقع ف هاد المجال.

كورساتهم أغلبها بالتنسيق مع أهم الجامعات الامريكية. الكورسات مجانية وكتشمل أغلب المجالات الجامعية العلمية والادبية. من الهندسة المعلوماتية حتا للفلسفة مرورا بالتاريخ والبرمجة ديال الويب.

الموقع, وﻷن كورساتو كيشرف عليها ناس خبراء, كيعطيك إمكانية تاخد شهادة مقابل 100 دولار (حوالي ألف درهم مغربي).

الشهادة رغم أنها لا تعادل الشهادة الجامعية, لكن تقدر تزيدها ف السيفي ديالك كيفما كيقول السيت.

5. MIT OpenCourseWare

هذا موقع محتواه متقدم شوية وماشي للجميع. MIT OpenCourseWare هي مبادرة من عند الام آي تي,  معهد ماساتشوستس للتكنولوجيا, الطوب ديال الطوب ديال جامعات العلوم ف العالم.

الموقع كتتحط فيه محاضرات الجامعة كاملة مع المتريال ديالها. النيفو غالبا شوية عالي. لأنه موجه للمستوى الجامعي ولناس اللي متفوقين.

المحاضرات اللي كيلوح الموقع, وعكس المواقع الفوق, هي عبارة عن محاضرات تقليدية مسجلة من قلب الجامعة. أستاذ كيهضر معاك ومع عشرات الطلبة وكيكتب ف سبورة.

باختصار كأنك ف الـ MIT شخصيا.

6. Thenewboston

هذا ماشي موقع (رغم انه عندو موقع), وماشي جامعة ولا مؤسسة, ولكن قناة يوتوب ديال شخص واحد.

Bucky Roberts من الاشخاص القلال اللي من حقهم يجاوبوا على السؤال الاستنكاري ديال “واش نتا آخويا كتفهم ف كلشي؟!” بكل تقة ف النفس بآه.

كيفهم ف كلشي وكيتشارك فهامتو مع مليون ونص سبسكرايبر اللي عندو  ف القناة ديالو (وطبعا ملايين الزوار للموقع).

باكي عندو 4 الاف فيديو ف قناتو ف محتلف المجالات, من الخدمة بلينكس وتبروكرامي بالجافا, حتا لكيفاش تصايب البيرة ف الدار.

 

طبعا هذو ماشي كلشي, لكن هذو جربناهم بشكل شخصي وعجبونا.

ادا كان شي موقع مشابه سبق لك جربتيه وعجبك, تفضل صيفطولنا نزيدوه.

المقال غادي يتم تحديثو مع الوقت.

Did you find apk for android? You can find new Free Android Games and apps.

كومنطي

تعليقات


شنو ردة فعلك؟
كيوت كيوت
0
كيوت
هاهاها هاهاها
1
هاهاها
جيم جيم
1
جيم
أو إم دجي أو إم دجي
1
أو إم دجي
واضفّاك؟ واضفّاك؟
0
واضفّاك؟
ديسلايك ديسلايك
1
ديسلايك
لايك لايك
4
لايك

أفضل 6 مواقع MOOC فين تقدر تتعلم تقريبا أي حاجة هاد الصيف

log in

Become a part of our community!
ما عندكش كونط؟
sign up

reset password

الرجوع لـ
log in

sign up

Join BoomBox Community

الرجوع لـ
log in